– Eg hevði gjørt ein tunnil til Suðuroyar

Kristian Búgvason í Króki býr á Argjum og gongur í Frískúlanum í Havn í 5. flokki. Mynd: Privat

Kristian:

– Um eg var løgmaður, hevði eg gjørt ein tunnil til Suðuroyar, soleiðis at eingin behøvist at sigla í tveir tímar fyri at koma til og frá Suðuroy.

– Eg hevði bygt fleiri sjúkrahús, serliga á øðrum oyggjum, so at um onkur t.d. er deyðasjúkur á Sandoynni, so kundu tey komið til eitt sjúkrahús upp á stutta tíð, og eg hevði syrgt fyri, at fleiri skurðviðgerðir kunnu gerast í Føroyum.

– Vit skulu taka ímóti flóttum, tí fyristilla tær, at tit eru í Ukraina og flýggja og koma til Føroyar. Og um svarið tá er: „Vit taka ikki ímóti flóttafólki, far heim”. Vit kunnu, og vit skulu hjálpa, har vit kunnu. Eg haldi, vit duga væl at hava færri heimleys fólk.

– Vit skulu framhaldandi vera ein partur av Danmark, tí vit eru eitt lítið land, og hvussu skulu vit klára okkum, um t.d. Russland loypur á okkum?

– Tað skal vera frítt at ganga í haganum fyri øll, men vit skulu vera sikkur upp á, at vit hava ein haga at ganga í. Tí mugu vit viðlíkahalda hann.

– Og eg hevði latið skúladagar vera 7 tímar og minkað summarferiuna til 7 vikur. Eg haldi eisini, at prísirnir skulu niður, soleiðis at øll ikki vera fátøk, og eg haldi eisini, at fleiri bústaðarmøguleikar skulu vera. Og so skulu vit minka um CO2-útlátið við elbilum og fleiri vindmyllum.